На пытанні журналістаў адказалі начальнік галоўнага ўпраўлення ЖКГ аблвыканкама Дзмітрый Соцкі, генеральны дырэктар РУП «Гомельаўтадар» Дзяніс Ясько, генеральны дырэктар КПРБУП «Гомельаблдарбуд» Ігар Краўчанка.
Сетка аўтадарог рэгіёна, падкрэсліў Дзмітрый Соцкі, з’яўляецца найважнейшым складальнікам стабільнай працы эканомікі і жыццядзейнасці людзей у цэлым. За мінулую пяцігодку ў плане павышэння якасці і бяспекі дарог, аптымізацыі дарожнай інфраструктуры зроблена сапраўды нямала. Адрамантавана 2,5 тысячы кіламетраў рэспубліканскіх дарог, за якія адказвае «Гомельаўтадар», і 1,5 тысячы мясцовых («Гомельаблдарбуд»). За пяць гадоў таксама рэканструявана 78 маставых збудаванняў.
Работа будзе прадоўжана ў бягучым пяцігоддзі, падкрэсліў Дзмітрый Соцкі. Прыкладна той жа план рамонту выканае «Гомельаўтадар», а вось план па мясцовых аўтадарогах, якія злучаюць райцэнтры з аграгарадкамі, сельскімі населенымі пунктамі, маштабней – «Гомельаблдарбуд» да 2030 года адрамантуе больш за 2,3 тысячы кіламетраў.
Дзяніс Ясько расказаў пра значныя праекты, рэалізаваныя за пяцігодку. Сярод іх мост цераз Днепр у Рагачове, два пуцеправоды ў Калінкавіцкім раёне, пуцеправод на мяжы Жыткавіцкага і Петрыкаўскага раёнаў. А таксама мост цераз Прыпяць пад Мазыром, другі па працягласці ў краіне, адкрыты ў канцы мінулага года з удзелам Прэзідэнта Беларусі. Першы па працягласці, дарэчы, таксама размешчаны ў Мазырскім раёне.
Дзяніс Ясько дадаў аб пачатку рэканструкцыі трасы М10 – праект разбіты на чэргі, будзе рэканструявана 85 кіламетраў. Працягнуцца работы на мастах і пуцеправодах, самыя буйныя аб’екты да 2030-га будуць здадзены. У лістападзе гэтага года павінны адкрыць мост цераз Случ на мяжы Гомельшчыны і Брэстчыны. Да канца 2026-га плануецца завяршыць работы на мосце цераз Сож у Веткаўскім раёне, у 2027-м – на мосце праз Днепр у Рэчыцкім. Яшчэ ў планах рэканструкцыя аўтадарогі Р34 у Акцябрскім раёне, з давядзеннем да 11 тон апорнай здольнасці, гэта значыць шлях будзе адкрыты для вялікагрузнага транспарту.
Ігар Краўчанка адзначыў, што на балансе «Гомельаблдарбуда» звыш 10 тысяч кіламетраў мясцовых аўтадарог плюс вуліцы сельскіх населеных пунктаў, больш за 400 маставых збудаванняў і іншыя аб’екты. Задачы мінулага пяцігоддзя перевыкананы, асноўны ўпор рабіўся і будзе рабіцца на рамонце дарожнага пакрыцця. Праведзеная работа дазволіла знізіць аб’ёмы ямачных рамонтаў і колькасць ДТЗ. Паступова вырабляецца пераклад дарог з гравійным пакрыццём ў асфальтабетонныя.
Асноўная ўвага «Гомельаблдарбуда» акцэнтавана на аграгарадках, у першую чаргу на сталіцы абласных дажынак гэтага года – Калінкавічах. Вуліца Савецкая райцэнтра, да прыкладу, стане чатырохпалоснай па ўсёй даўжыні.
Стан мясцовых аўтадарог на Гомельшчыне застаецца на годным узроўні, сярэдні бал іх эксплуатацыі і ўтрымання самы высокі сярод будаўнічых прадпрыемстваў краіны.
Да 2030-га перад будаўнікамі стаяць маштабныя задачы. У Гомелі пачнецца рамонт вуліцы Аб’язной. Акрамя замены пакрыцця ад Сонечнай да Барыкіна, будзе выканана рэканструкцыя хімзаводскага пуцеправода.
Працягнецца таксама рэалізацыя знакавага транспартнага аб’екта – Усходняга абходу пад Гомелем, з будаўніцтвам маставога збудавання. Аб’ект разгрузіць цэнтр, звяжа вуліцы Хатаевіча і Добрушскую, Раманавічы, у цэлым значна палепшыць лагістыку для ўсіх вадзіцеляў, гамяльчан і гасцей горада.
