Старшыня аблвыканкама Іван Крупко правёў пасяджэнне Савета садзейнічання прыцягненню інвестыцый. Удзел у пасяджэнні прыняла член Савета Рэспублікі, старшыня абласнога Савета дэпутатаў Кацярына Зянкевіч.
Разгледжаны пытанні рэалізацыі інвестпраектаў прадпрыемствамі Гомельшчыны ў галіне станкабудавання, дрэваапрацоўкі, вытворчасці хімічных угнаенняў. У прыватнасці, абмеркавалі рэалізацыю праекта па стварэнні імпартазамяшчальнай прадукцыі прадпрыемствам «СтанкаГомель».
Мадэрнізацыя вытворчасці будзе праходзіць да 2028 года і прадугледжвае устаноўку новага апрацоўчага абсталявання і стварэнне лінейкі шмат функцыянальных гарызантальных апрацоўчых цэнтраў, запатрабаваных як на знешнім, так і на ўнутраным рынку.
– Пры выхадзе на праектную магутнасць мы будзем выпускаць у год не менш за 144 адзінкі. Праект стане самым маштабным для прадпрыемства за апошнія дзесяцігоддзі і з’яўляецца значным для Беларусі ў частцы развіцця станкабудаўнічай галіны, – распавёў журналістам дырэктар ААТ «СтанкаГомель» Андрэй Жалезнякоў.
На заводзе абноўлена ўся лінейка апрацоўчага абсталявання, якая дазваляе рабіць апрацоўку дэталяў, не выходзячы за межы дзеючай вытворчасці. У рамках рэалізацыі праекта плануецца стварэнне не менш як 30 высокапрадукцыйных сучасных рабочых месцаў для будучых выпускнікоў каледжаў і ВНУ.
Яшчэ адзін праект, разгледжаны Саветам, – рэканструкцыя сернакіслотнага цэха Гомельскага хімзавода з павелічэннем магутнасці вытворчасці. Запланавана замена тэхналагічнага абсталявання на больш магутнае і інавацыйнае. Тэрмін рэалізацыі праекта – каля пяці гадоў, працы стартавалі ў 2024-м, мадэрнізацыю плануюць завершыць восенню 2029 года. Гэта дазволіць стварыць 12 дадатковых рабочых месцаў.
Пасля ўводу новага цэха плануецца павелічэнне аб’ёмаў вытворчасці сернай кіслаты з 700 тысяч тон да мільёна тон у год з паляпшэннем тэхніка-эканамічных паказчыкаў яго эксплуатацыі, дзякуючы чаму завод зможа генерыраваць больш уласнай электраэнергіі: з 50% да 80% ад агульнага спажывання за кошт дадатковай выпрацоўкі пара.
– Гэта дазволіць выключыць закупку звонку сернай кіслаты, неабходнай для вытворчасці угнаенняў, а таксама вырабляць дадатковую электраэнергію. Гэтыя фактары паўплываюць на зніжэнне сабекошту прадукцыі і на павелічэнне яе канкурэнтаздольнасці на ўнутраным і знешнім рынку, – падзяліўся дырэктар Гомельскага хімзавода Дзмітрый Чарнякоў.
Першая чарга будаўніцтва ўжо пачалася, вядзецца распрацоўка праекта другой чаргі, ажыццяўляецца пастаўка абсталявання.
Плануецца, што пры ўмове ўключэння праекта ў спіс прэферэнцыйных, ён атрымае дзяржаўную падтрымку і мытныя льготы, якія станоўча адаб’юцца на фінансавых выніках яго рэалізацыі.
Па выніках пасяджэння прыняты рашэнні аб заключэнні дадатковых пагадненняў з арганізацыямі, якія займаюцца рэалізацыяй праектаў.
